శార్దూల్ ఠాకూర్ ను ఇంపాక్ట్ ప్లేయర్ గా తెచ్చి ఒక్క ఓవర్ కూడా వేయించలేదు. హార్దిక్ పాండ్యా వ్యూహాలపై గవాస్కర్ తీవ్ర విమర్శలు. ముంబైకి దరిద్రం పట్టించిందా?
హైదరాబాద్ వేదికగా జరిగిన మ్యాచ్ లో సన్రైజర్స్ హైదరాబాద్ చెలరేగింది. ముంబై ఇండియన్స్ నిర్దేశించిన 243 పరుగుల భారీ లక్ష్యాన్ని 8 బంతులు మిగిలి ఉండగానే ఛేదించి, వరుసగా ఐదో విజయాన్ని అందుకుంది. రియాన్ రికెల్టన్ సెంచరీతో ముంబై భారీ స్కోర్ చేసినా, SRH ఓపెనర్లు హెడ్, అభిషేక్, క్లాసెన్ మెరుపులతో అదరగొట్టారు. ఈ విజయం SRH ను పాయింట్ల పట్టికలో పైకి తెచ్చింది.
ఇక ముంబై ఇండియన్స్ ఓటమిపై క్రికెట్ దిగ్గజం సునీల్ గవాస్కర్ తీవ్ర ఆగ్రహం వ్యక్తం చేశారు. ముఖ్యంగా 'ఇంపాక్ట్ ప్లేయర్' నిబంధనను వాడటంలో కెప్టెన్ హార్దిక్ పాండ్యా విఫలమయ్యాడని మండిపడ్డారు. శార్దూల్ ఠాకూర్ ను ఇంపాక్ట్ ప్లేయర్ గా తెచ్చి, ఒక్క ఓవర్ కూడా వేయించకపోవడంపై గవాస్కర్ ఘాటుగా స్పందించారు. బౌలర్లు పరుగులు ఇస్తుంటే, వికెట్లు తీయగల సత్తా ఉన్న శార్దూల్ ను ఫీల్డింగ్ కే పరిమితం చేయడం మూర్ఖత్వమని విమర్శించారు.
శార్దూల్ ఠాకూర్ ఐపీఎల్ చరిత్రలోనే బ్యాటింగ్, బౌలింగ్ చేయకుండా మిగిలిపోయిన తొలి ఇంపాక్ట్ ప్లేయర్ గా నిలిచారు. ఈ వ్యూహాత్మక తప్పిదం వల్లే ముంబై మ్యాచ్ చేజార్చుకుందని గవాస్కర్ అభిప్రాయపడ్డారు. హార్దిక్ తన అవకాశాలను సరిగ్గా వాడుకోలేకపోయారని, ఈ ఓటమి నుంచి ముంబై జట్టు రాబోయే మ్యాచ్ల్లోనైనా గుణపాఠాలు నేర్చుకుంటుందో లేదో చూడాలి. SRH వరుస విజయాలతో దూసుకుపోతుంటే, MI పాయింట్ల పట్టికలో కిందకు జారుతోంది.
