దళపతి విజయ్ సీఎం కావడంతో ఆగిపోయిన ఆయన చివరి సినిమాపై ఉత్కంఠ పెరిగింది. సెన్సార్ చిక్కులతో ఆగిన ఈ చిత్రం ఎప్పుడు రాబోతుందో నిర్మాత కుండబద్దలు కొట్టేశారు.
తమిళనాడు రాజకీయాల్లో ఇప్పుడు సరికొత్త అధ్యాయం మొదలైంది. నిన్నటి దాకా సిల్వర్ స్క్రీన్ పై మాస్ హీరోగా అలరించిన దళపతి విజయ్, ఇప్పుడు సీఎం కుర్చీలో కూర్చుని రియల్ లైఫ్ జన నాయగన్ గా మారారు. ఆయన ప్రమాణ స్వీకారోత్సవం చూసి ఫ్యాన్స్ అంతా పండగ చేసుకుంటుంటే, మరోవైపు ఇండస్ట్రీలో ఒకటే హాట్ టాపిక్ నడుస్తోంది. అదే ఆయన నటించిన ఆఖరి సినిమా, సెన్సార్ చిక్కుల్లో పడ్డ జన నాయగన్ విడుదల! హెచ్. వినోద్ దర్శకత్వంలో తెరకెక్కిన ఈ పొలిటికల్ థ్రిల్లర్ విజయ్ కెరీర్ లోనే బిగ్గెస్ట్ పాన్ ఇండియా ప్రాజెక్ట్ గా రాబోతోంది.
నిజానికి సంక్రాంతి బరిలో ఈ చిత్రాన్ని దింపి, దళపతికి గ్రాండ్ ఫేర్ వెల్ ఇవ్వాలని అభిమానులు కలలు కన్నారు. కానీ సెన్సార్ బోర్డ్ బ్రేకులు వేయడంతో లెక్కలన్నీ మారిపోయాయి. అసలే సీఎం కాబోతున్న స్టార్ హీరో సినిమా కావడంతో ఆ లోపల పాలిటిక్స్ ఎలా ఉంటాయోనని అందరిలోనూ విపరీతమైన క్యూరియాసిటీ పెరిగింది. సరిగ్గా ఈ ఉత్కంఠ మధ్యలోనే చెన్నైలో జరిగిన విజయ్ ప్రమాణ స్వీకారానికి హాజరైన నిర్మాత కేవీఎన్ ఒక సాలిడ్ అప్డేట్ ఇచ్చారు. "అందరూ స్క్రీన్ పై జన నాయగన్ కోసం చూస్తుంటే, ఆయన బయట నిజమైన జన నాయకుడు అయిపోయారు" అంటూ ఫ్యాన్స్ కి పూనకాలు తెప్పించారు.
సెన్సార్ సర్టిఫికెట్ రాగానే సినిమాను థియేటర్లలోకి దించుతామని నిర్మాత స్పష్టం చేయడంతో ఇప్పుడు టాలీవుడ్, కోలీవుడ్ వర్గాల్లో కొత్త ఈక్వేషన్స్ మొదలయ్యాయి. ఒక ముఖ్యమంత్రి నటించిన సినిమా రిలీజ్ కావడం ఇండియన్ సినిమా హిస్టరీలోనే ఒక రేర్ రికార్డ్. ఈ క్రేజ్ తో సినిమా ఓటీటీ, శాటిలైట్ రైట్స్ కళ్లు చెదిరే ధరకు అమ్ముడయ్యే ఛాన్స్ ఉందని ట్రేడ్ పండితులు లెక్కలేస్తున్నారు. ఫ్యాన్స్ అయితే "సీఎం సార్ మాస్ ఎంట్రీ" కోసం అప్పుడే థియేటర్ల దగ్గర కటౌట్స్ రెడీ చేసుకుంటున్నారు. అతి త్వరలోనే మేకర్స్ నుంచి అఫీషియల్ రిలీజ్ డేట్ పోస్టర్ రాబోతోంది!
